D´Muetter chont denn morn cho zahle

Antworten
Benutzeravatar
HansPeter
Eifriger Schreiber
Eifriger Schreiber
Beiträge: 406
Registriert: Samstag 20. März 2010, 11:52
Wohnort: Riehen bei Basel Schweiz
Kontaktdaten:

D´Muetter chont denn morn cho zahle

Beitrag von HansPeter »

Bild

D´Muetter chont denn morn cho zahle

Wenn me so als Chend mit em Grossvatter im Herbscht an Joormart het döre go, oder e betzeli spööter denn aafngs Sommer as Chenderfesch, ischt amel au en Ballonmaa ommegange. Jo, denn sönd au d’Auge vo ös Goofe gross worde, grd e so gross wie die schöne Ballön. Me hett en sch ovo wiitem gsee, de Ballonmaa. Ganzi Trupple vo gosse ond chline Ballön i n allne Farbe ond Forme sönd zo äm Bündel zemmegfasst gsee, ond sönd vom e liechte Windli, wiit öber de Chöpf vo de Lüüt, hii ond her pambelet. E so viil Ballön of em Huffe, me hett grad chöne meene, dass die Ballön vo dem chline, düerre Mandli en nöd chönet am Bode one hebe. I ha mer denn amel vorgschtellt, wies uusgsächt, wenn de jetzt wör uuf ond defoo flüüge.

I ha wie ali Chend, die Ballön choge gern gkha, am liebschte en rote, ond e so än hani mer den amel au dörfe uussueche. Öb rond, owal oder as langi Boone ischt meer eeding gsee, d’hoptsach ischt doch gsee, dass i een ha dörfe haa. De Grossvatter het en den om mis lingg Handglenk ponde, e soo, das er nöd het chöne defo flüüge. De Hee het mer en den loosponde. Im huii ischt er denn loschtig hii ond her gschauklet, ond so a Decki ufe gfloge. Er het sich denn döt wädli i nen Egge verzoge, als wörer e betzeli täubele ond truurig see, wel er jetzt e so e lee ischt ond nüme bi de andere bunte Ballön dörf see. Mer isches amel nümme e so gschmuech gsee. Ee mol hani e Schemeli gholt, bi ofs ue gschtege ond han en a de wiisse Schur vo de Decki abezoge. Denn bi n i schnuurschtraks as Fenster an gange ond han en flüüge lo. „Flüüg“ hani gsäät, „gang zu dine Frund“, ond denn ha n i agfange bleege. De Grosvatter het mi denn tröschtet ond het zue mer gsäät, „du Dommerli, hescht en flüüge lo, de Ballonmaa cha nen aber nümme zo sich abe hole, er ischt z’höch obe, aber d’Engel werid au erni Freud dra ha. Ond morn ischt jo au no Joormart, ond denn chonscht en Neue öber“.

Spöter denn, wo ni scho im Chrüüzweg i d’Schule ha möse, hönd mi die Ballön immer no fasziniert. E mool, am e ne freie Mittwochnomittag bin in Chrüüzweg före gange. Da ischt nöd wiit vo de Hee gse, e Quatier mit luter Läde, wo n i amel ha möse go Poschte. Do gsie n i scho vo wiitem, das es Goofe ommenand gka het ,wo en Ballon i den Hand ghebet , ond stolz Hee träget hönd. On do hets mi packt, i ha au een wöle ond ha denn erber wädli usegfonde, das me die i ne Apetheg bi de Frau Nessensohn öberchont. S’ischt nöd lang gange, do bi n i dei gse, wos die farige Chugle ge het. I bi ganz schüüch ine gange. „Wa muescht haa, Hans-Peterli“ fröget d’Frau Nessensohn. Jo, jetzt bi n i doo gschtande vor em Ladetisch, ond bi doch e betzeli vechlopft. Doch s’ischt nöd lang gange do ischts os meer use gschprudlet, „e chliises Schäteli Malex, d’Muetter het Chopfwee, si chont den morn cho zale“. Natürli ha n i da wo n i bschtellt ha au öbercho und erscht no en schöne, rote Loftballon. Wa denn de Hee passiert ischt, cha sech die gneigt Leserschaft sech jo selber uusmoole...

D’Muetter het d’chiibet, „wart no bis de Bappe hee chont, jetzt goscht wädli zrock i d’Apetheg, bringscht d’Malex samt em Ballon omme. Ond wenn denn zrock bischt, gots ab is Bett“. Au, do ha n i för lang kenn Ballon me chöne aaluege und gschemet ha ni mi, ond wie.

Wo n i denn scho e paar Jöhrli älter gsee bi, ha n i ohmächtig of Määtli gschpunne. Si het natürlech nüz vo minere Liebi zu ere gwösst. I bi i de drette Klass gse ond ha is Dorf ufe möse i d’Schuel. Do hani doch e mool noch de Schuel gsee, das es bim Schuehuus Eugster Ballön get, schöni, roti Loftballön, zemeponde zom e ne grosse Tschuppel. Wie en Blitz hets do bi mer iigschlage. I ha en möse ha, ne, ne, chaufe ha n i nünt möse, i ha nen vergebes öberchoo. Denn bin i wädli mit dere rote Chugle i d’nöchi vo dem Huus ane gschtande, wo da Määtli gwohnt het. Sischt nöd lang gange, ischt si ded’her cho, i bi vor si ane gschtande, ond ha n ere de Ballon here ghebet. Nöd schüüch, aber erber verlege bi n i gsee. I bi fascht e chli verchlopft, wo si mer de Ballon abgno het, danke gsäät het, ond denn im Iigang zo erem Huus mit em verschwondi ischt.

Nomol e chli spööter ha ni döre is Ferielager in Hemberg ue. Da, Määtli, wo immer no nöd wäss, dass sie min Schatz ischt, ischt au mit i das Ferielager cho. Chum sönd mer dei aacho, hani en oomächtige Durchfall ond Fieber öberchoo. I ha den e ääges Zimmerli öbercho und ha immer öppe au Bsuech vo andere Schüeler gka. E mol sönd zwo Meetle mit e me schtrüüssli Blüemli ine cho on hönd mer au noch gfaltets Zedeli ane gehebet. Si sönd denn aber erber gschwind lachend uuf ond de foo. Wo ni da Zedeli uuf tu ha ond glese ha, wa drenn stoot, ha n i en erber heisse Chopf öbercho, nei, nei, nöd vom Fieber ischt da cho, seb ist scho am abklinge gsee. > willscht du mich als Schatz, Maya < ischt drenn gschtande ond e paar Verzierige drom. En rote Loftbalon ischt au no droff gmolet gsee. Do het mis Herz aber erber fescht pöpperlet. Jede Obed ischt amel noch em Nachtesse no ne chli Tanz gsee. E Lehreri het e Handorgle mit debii gka. Wo n i denn wider gsond gse bi, ha no immer ii ond sosch ken andere döre mit mim Schatz tanze, de Schneewalzer ischts gseh, ond immer wider de Schneewalzer...


© Hans-Peter Zürcher
Zuletzt geändert von HansPeter am Freitag 22. April 2011, 14:59, insgesamt 2-mal geändert.
Ich schätze es wenn meine Mitmenschen glücklich sind.
Das macht wiederum auch mich glücklich.

© Hans-Peter Zürcher
Benutzeravatar
Stiekel
Eifriger Schreiber
Eifriger Schreiber
Beiträge: 978
Registriert: Dienstag 11. Januar 2011, 19:43
Kontaktdaten:

Re: D´Muetter chont denn morn cho zahle

Beitrag von Stiekel »

Hallo Hans-Peter,

eine schöne Liebesgeschichte rund um den Luftballon.
Habe es gerne gelesen.
Wenn ich auch nicht jedes Wort verstanden habe.

Liebe Grüße von Sabine
Bild

Nur wer sich selber liebt ist fähig,
auch andere zu lieben.
Benutzeravatar
HansPeter
Eifriger Schreiber
Eifriger Schreiber
Beiträge: 406
Registriert: Samstag 20. März 2010, 11:52
Wohnort: Riehen bei Basel Schweiz
Kontaktdaten:

Re: D´Muetter chont denn morn cho zahle

Beitrag von HansPeter »

Liebe Sabine,

vielen Dank. Ich komme aus dem Appenzellerland, also aus dem alemannischen Sprachraum. Es ist gar nicht einfach, in Mundart zu schreiben, vor allem wenn man seit über viergig Jahre von seiner Heimat entfent lebt. Auch Basel zählt zu diesem Sprchraum, aber der dialekt ist völlig anderes...

Liebe Ostergrüsse

Hans-Peter
Ich schätze es wenn meine Mitmenschen glücklich sind.
Das macht wiederum auch mich glücklich.

© Hans-Peter Zürcher
Antworten