Ik teuf op di Lehmann

Antworten
Benutzeravatar
Gila
Eifriger Schreiber
Eifriger Schreiber
Beiträge: 390
Registriert: Mittwoch 9. März 2011, 19:16

Ik teuf op di Lehmann

Beitrag von Gila »

Utmustert, to düer un to old, mit veerunföftig. Hüt sitt ik wedder bi de Arge un teuf, bet Herr Lehmann mi opröpt. He is mien persönliche Beroter. Kuum sitt ik em gegenöber, secht he wedder: „Nun zeigen sie mal, wo haben sie sich überall vorgestellt?“ Weet he nich, wie dat op´n Arbeitsmarkt utsüht. Öberhaupt, wie de Mann mi behannelt, jümmer so vun boben rünner, dat mookt mi fünsch. Jümmer so, as wär ik een Fuuljack un een Dööskopp. Dorbi hett he doch mien Ünnerlogen dörchkeeken un weet, keen ik bün un wat ik kann. Ton Inhalt hett he nix secht, man bloots optisch har he wat to garn. „Der erste Eindruck ist wichtig! Dies hier macht sich als Blocksatz besser und das hier immer unterstreichen. Alles andere rechtsbündig“, mokt he mi wies un achteran käm „das überarbeiten sie und legen mir nächstes mal vor.“ Mien Mapp wär op dann neesten Stand, ok optisch. Ober de Mann lett nie nich mit sik snacken, piesackt mi un mookt mi jümmer lütter. Ne, mit den is keen groode Föhr to ploegen. He hett dat Seggen un ik mut rünnerslucken. Ton Glück sünds se nich all so. Un glööv man, he kummt sien Herrn ok noch to Hus.

Bilütten wöör ik meist jedeen Arbeid annehm, ober veel steiht nich in int Blatt. Dat Malör is ok, dat ik tominst twee groote Fehler heff. Ik bün jümmer ünner-/ oder öberqualifiziert. Un so föhl ik mi so wiertlos, so unnütz. Jümmer mehr is mi allens schietegol. Ik sitt faken an Reekner un speel Kampfspeele, gammel sowat rüm. Ik teuf dat de Dach vörbi geiht, teuf dat een Droom wohr ward, teuf ob een Wunner. Dat is allens swor to verknusen un treckt mi bannich daal. Mennigmol kumm ik dor bloots mit´n Sluck gegenan. Man denn gift dat bobento noch Stried mit mien Fro. Wiel Geld, ton Versupen, hebbt wi nich öber. Gedanken heff ik ok nich de besten. Mien Nober, een Amtmann, düsse Kloogschieter mit sien Spröök …. keen Arbeid söcht de find ok Arbeid ….. den kunn ik an de Plünn gohn un Arge Lehmann glicks mit.

Seriöses Detektivbüro (Geheimdiensttätigkeit/Beschattung u.ä) sucht „sie“! Kontaktieren sie Herrn Beer unter der Rufnummer dree, acht, veer und so wieder. So ähnlich hett dat in de Anzeig stohn. Ik heff dor anropen un mien Sprök opsecht. Warst dat nich glöben, ik schull eenfach mol vörbikummen. Man wat wär ik opgeregt. Mit de Mapp ünnern Arm, akraat in Kledasch smeten, bün ik tiedig hen. Tiedig, dat is nich so eenfach, jedenfalls nich ör een Langtiedarbeidslosen. Dat du nich op de Klock kieken must, dor wennst di an. Is doch an Enn dat eenzigst Goode an de Hartzeree. Tied speelt keen Rull, keen teuft all ob di.

„Was haben sie für Referenzen, wie sieht es aus mit Selbstverteidigung, Kampfsport, Ausdauer?“, hett mi de Macker froogt. Referenzen, op dat Flach süht dat nicht good ut, is doch nich mien Profeschoon. Ik bün mehr sowat as een Studierten, de op de Arbeid losloten ward. Theoretisch weet ik bescheed. James Bond oder Jason Bourn, kunn ik doublen, ik kenn all Folgen. Also würklich, theoretisch weet ik bescheed.

Dat Wunner is passeert, se hebt mi wohrraftig instellt. Nich wegen mien Referenzen, se hebt mi instellt wegen mien pA, persönliche Ausstrahlung. Ik bün ünnern Dürschnitt, nahrtau unsichtbor, mien pA geiht gegen Null. Ik bün dormit de ideole Agent ton Lüüd beluern. Wär mien pA opfällig, harn mi de beste Ünnerlogen und de größte IQ nix nützt.

Siet fief Dach sitt ik hier nu an´t Finster un spickeleer dat Huus gegenöber. Dann leeben langen Dach nix as teuben un nipp un nau opschrieben, keen dor rut un rin geiht. Dorför, dat man dree Partien int Hus wahnt, is dor veel Verkehr. Sünd opfällig fehle Mannslüüd de dor dörch de Döör goht. Un een vun de Inwohners mut de Süük hebben, wiel jeden Dach, gegen Klock Tein, kümmt een, de süht ut as een Doktor. He kümmt to Foot un blievt ne ganze Stünn. Gediegen, entweder mut de goode Mann ünner Verfolgungswahn lieden oder he hett Bang dat em een süht. He kümmt anbirst un kiekt sik jümmerto üm, kort vör de Husdöör dreiht he siek, kiekt nochmol un hutsch trüchoors dörch de Döör. Ik heff man keen Ohnung wo he pingelt. Doch, teuf mol, wat heff ik hier schreben…. 10:05 Uhr, Wohnung parterre rechts, Frau mittelblond, schließt Vorhänge. Stünnen loter, Klock Ölben ward se wedder optrocken. Dat mookt de Fro nich eenmol, ne mennigmol an Dach. Wat sünd denn dat för Grappen? Normalerwies deit´n dat nich. Ik glööv, dor is de Doktor an kureern. De arme Fro mut jichenswat fehlen, also ik Tip op Neurose.

Dree Weeken heff ik nu allns pienlich genau opschreben und hüüt kriegt wie em bi de Büx. Glicks kummt he wedder rut, de Swienjack. Nich de Doktor, nee, Arge Lehmann. Dor sünd twee vun Gewerbeobsichtsamt, twee Udels, mien Boss un natürlich ik. Wie teuft för de Döör op em un ik kann dat kuum noch afteuben. Lehmann arbeid nich bloots bi de Arge, ne dat is noch veel leeger. He is Hauptberuflich Ünnernehmer un kümmt jeden Sünnobend afkassiern. Wo, na bi de mittelblonde Fro, parterre, rechtehand. Dat mit de Neurose wär ünnern Strich een Fehldiagnoose. Man op´n Strich is de Fro Subunternehmer un arbeid för sik sülben, Tüünkram för Lehmann. Keen Stüern hebt se betahlt, keen Gewerbe anmeld, allens swatt. Dat gift Arger. Ik seh dat all vör mi, Lehmann in Handschellen, inbucht un dat allerbest ---- ------arbeidslos.

Schietkroom, bün inslopen un heff wedder dröömt. Jümmer wook ik kort fört Enn op. Ober jichenswann ward dat wat un he kriegt sien Fett af. Man dröppt sick int Leben jümmer tweemol. Ik heff veel Tied, ik teuf op di, Lehmann.
Antworten