schreibpodium.de

Ik heff dor een Nobersch, een de allens weet
weet ok öber mi, allerbestens bescheed
ik goh to Arbeid, in alle Hergottsfröh
trüch kumm ik loot Obends, in de Schummere
denn brennt bi mi´t Licht noch, bet merrn in de Nacht
un all tiedig fröh Morrns un dorüm het se dacht
ik sloop man dree Stünnen un de anner Tied
mut ik noch reinmaken, prünnen un so´n Schiet
dat ik so fliedig bün, vertellt se jedeen
een fliedigeren Minschen, dor kinnt se keen
so een Sludere, de is doch bannig nett
dorbi liech ik komodig all lang in mien Bett
na und wiel ik Nachens dann Lokus nich finn
schalt vun alleen in Düster lütt Licht sick in
un geiht erst wedder ut, morrns in Hellen
ober dat mut ik jo nich de Nobersch vertellen

O Gila,
wat hesst du nu maakt?
Wenn dat dien Nobersch leest,
denn büst du bi hör unnern döör.

Ik wünsch di´n goden Slaap
un minn Lokusgänge.
Van Haarten, Sabine

Gooden Nobend,

man keen Bang, mien Nobersch is 87 Johr old un hett keen Computer. Ok wiet un breet is dor keen, de in ditt Flach togang is. Heff mi dat wohl överlecht, ob ik dat schrieven kann. Man, ik heff mi so höcht, dat se mi so süht. In de Twüschentied bün ik jo nu to Hus un goh nich mehr op Arbeid. Ober över de Familie war ik noch mehr to schrieven hebben.

Ik bedank mi, dat Du mi anstött hest, vun wegen Arger kriegen. Mennichmol bün ik to gau un to unöverlecht, ober dat kannst eegentlich noch nich weeten, oder doch??????

Ik wünsch di wat (Goodes)

un goode Nacht Gila